நாத்திகர்களை வாங்குவாங்கென வாங்கிய கண்ணதாசன் thanks to dinamalar.com

பொது செய்தி 

தமிழ்நாடு

நாத்திகர்களை வாங்குவாங்கென வாங்கிய கண்ணதாசன்

 

 188

சென்னை; ஈ.வெ.ரா., சேலத்தில் நடத்தியது போல் சென்னையிலும் ஒரு ஆபாச ஊர்வலம்
நடத்த முயன்றார். அப்போது கவிஞர் கண்ணதாசன், நாத்திகர்களை வாங்கு வாங்கென வாங்கியும், கடுமையாக விமர்சித்தும், கட்டுரை ஒன்றை வெளியிட்டார். இதனை தொடர்ந்து அந்த ஊர்வலம் கைவிடப்பட்டது.

கவிஞர் கண்ணதாசனின் எண்ணங்கள் ஆயிரம் என்ற நூலில் வெளியான அந்த கட்டுரை

மூட நம்பிக்கை ஒழிப்பு மகாநாடு என்ற பெயரில் 50 ஆண்டுகளுக்கு முன் தமிழகத்தின் பல ஊர்களில் நாத்திக பிரசாரத்தை ஈ.வெ.ரா தலைமையில் தி.க நடத்தியது. சேலத்தில் நடத்தியது போல சென்னையிலும் ஒரு ஊர்வலம் நடத்த ஏற்பாடு செய்தபோது கவியரசு கண்ணதாசன் அதுபற்றி ஒரு கட்டுரை எழுதினார். ஈ வெ ரா வையும் அவரது கட்சியினரையும் கிண்டலாக விமர்சிக்கும் அந்த கட்டுரை வெளியானதை அடுத்து சென்னையில் ஊர்வலம் நடத்தும் திட்டத்தை தி.க கைவிட்டதாக தெரிகிறது. கண்ணதாசன் கட்டுரையின் சில பகுதிகள் இங்கே:

நான் ஒரு இந்து.
இந்து என்பதில் நான்
பெருமைப்படுகிறேன்.
நான் எல்லா மதத்தினரையும்
மனமார நேசிக்கிறேன்;

ஆனால் இந்துவாகவே
வாழ விரும்புகிறேன்.

நான் கடவுளை நம்புகிறேன்;
அவனைக் காட்டியவனைப்
போற்றுகிறேன்;

அந்தக் கடவுளைக் கல்லிலும்,
கருத்திலும் கண்டு
வணங்குகிறேன்.
ஆன்மா இறைவனோடு
ஒன்றிவிடும்போது,
அமைதி இருதயத்தை
ஆட்சி செய்கிறது.
நாணயம், சத்தியம்,
தர்மம் இவற்றின் மீது நம்பிக்கை பிறக்கிறது.
நேரான வாழ்க்கையை
இருதயம் அவாவுகிறது.
பாதகங்களை, பாவங்களைக்
கண்டு அஞ்சுகிறது.

குறிப்பாக ஒரு இந்துவுக்குத்
தன் மத அமைப்பின்
மூலம் கிடைக்கும் நிம்மதி,
வேறு யாருக்கும் கிடைப்பதில்லை.
கடைசி நாத்திகனையும்,
அது ஆத்திகன் என்றே
அரவணைத்துக் கொள்கிறது.
என்னை திட்டுகிறவன்தான்
அடிக்கடி நினைத்துக் கொள்கிறான்;
ஆகவே அவன்தான் முதல் பக்தன்”
என்பது இறைவனின் வாக்கு.
இந்து மதத்தைப்போல்
சகிப்புத்தன்மை வாய்ந்த மதம்
உலகில் வேறு எதுவும் இல்லை .
நீ பிள்ளையாரை உடைக்கலாம்;
பெருமாள் நாமத்தை அழிக்கலாம்;
மதச்சின்னங்களை கேலி செய்யலாம்;
எதைச் செய்தாலும் இந்து
சகித்துக் கொள்கிறான்.
ஏதோ பரம்பரையாகவே
பகுத்தறிவாளனாகப் பிறந்தது
போல் எண்ணிக் கொண்டு,
பாத்திரத்தை நிரப்புவதற்காகவே
சாஸ்திரத்தைக் கேலி செய்யும்
பகுத்தறிவுத் தந்தைகள்
இஸ்லாத்தின் மீதோ,
கிறிஸ்துவத்தின் மீதோ
கை வைக்கட்டும் பார்க்கலாம்.
கடந்த நாற்பது வருசங்களில்
ஒரு நாளாவது அதற்கான
துணிவு ஏற்பட்டதாக தெரியவில்லையே!

பாவப்பட்ட இந்து மதத்தை
மட்டுமே தாக்கித் தாக்கி,
அதை நம்புகிற அப்பாவிகளிடம்
'ரேட்டு ' வாங்கிச் சொத்துச் சேர்க்கும்
'பெரிய ' மனிதர்களைத்தான்
நான் பார்த்திருக்கிறேன்.

அவர்கள் பேசுகிற நாத்திக வாதம்,
அவர்கள் 'குடும்பம் நடத்தும் வியாபாரம்'
என்பதை அறியாமல்,
வாழ்கையையே இழந்து நிற்கும்
பல பேரை நான் அறிவேன்.

பருவ காலத்தில் சருமத்தின்
அழகு மினுமினுப்பதைப் போல்,
ஆரம்ப காலத்தில் இந்த
வாதத்தைக் கேட்டு
ஏமாந்தவர்களில் நானும் ஒருவன்.

நடிகையின் 'மேக் அப்' பைக்
கண்டு ஏமாறுகிற சராசரி
மனிதனைப்போல்,
அன்று இந்த வாதத்தைக் கேட்டு
ஏமாந்தவர்களில் நானும் ஒருவன்.
அந்த கவர்ச்சி எனக்கு
குறுகிய காலக் கவர்ச்சியாகவே
இருந்தது இறைவனின் கருணையே!

என்னை அடிமை கொண்ட
கண்ணனும், ராமனும்
இன்று சந்திர மண்டலத்துக்குப்
பயணம் போகும் அமெரிக்காவையே
அடிமைக்கொண்டு,
ஆன்மீக நெறியில்
திளைக்க
வைத்திருக்கிறார்கள்.
அமெரிக்காவை விடவா
ஈரோடு பகுத்தறிவில்
முன்னேறிவிட்டது?

வேண்டுமானால்
'பணத்தறிவில்' முன்னேறிவிட்டது
என்று சொல்லலாம்.

ஆளுங் கட்சியாக
எது வந்தாலும்
ஆதரித்துக் கொண்டு,
தன் கட்சியும் உயிரோடிருப்பதாகக்
காட்டிக் கொண்டு,
எது கொடுத்தாலும் வாங்கிக்
கொண்டு வாழ்கையை
சுகமாக நடத்துவதற்கு,
இந்த நாத்திக போலிகள்
போட்டிருக்கும் திரை,
பகுத்தறிவு!

உலகத்தில் நாத்திகம்
பேசியவன் தோற்றதாக
வரலாறு உண்டே தவிர,
வென்றதாக இல்லை.

இதை உலகமெங்கும்
இறைவன் நிரூபித்துக்
கொண்டு வருகிறான்.

அவர்கள் எப்படியோ போகட்டும்.
இந்த சீசனில் வாழ்ந்து
கொண்டிருக்கும் சில மனிதர்கள்
கோவில்களுக்கு முன்னால்
பகுத்தறிவு விளையாட்டு
விளையாடிப் பார்க்கலாம்
என்று கருதுகிறார்கள்.
இதை அனுமதித்தால்,
விளைவு மோசமாக இருக்கும்.
நம்பிக்கை இல்லாதவன்
கோவிலுக்கு போக வேண்டாம்.
நம்புகிறவனை தடுப்பதற்கு
அவன் யார்?

அப்பாவி இந்துக்கள்
பேசாமல் இருக்க இருக்க
சமுதாய வியாபாரிகள்
கோவிலுக்கு முன் கடை
வைக்கத் தொடங்குகிறார்கள்.
வெள்ளைக்காரனின் கால்களை
கட்டிப்பிடித்துக் கொண்டு
'போகாதே போகாதே என் கணவா '
என்று பாடியவர்களுக்கு
நாட்டுப் பற்று எங்கிருந்து வரும்?
நாட்டு பற்று இல்லாதவர்களுக்கு
தெய்வப் பற்று எங்கிருந்து வரும்?

தெய்வப் பற்று இல்லாதவர்களுக்கு
நாணயம், நேர்மை இவற்றின்
மீது நம்பிக்கை எங்கிருந்து வரும்?
இந்த நாலரை கோடி (அன்று)
மக்களில் நீங்கள் சலித்துச் சலித்து
எடுத்தாலும், நாலாயிரம்
நாத்திகர்களைக் கூட காண முடியாது.

பழைய நாத்திகர்களை
எல்லாம் நான் பழனியிலும்,
திருப்பதியிலும் சந்தித்துக்
கொண்டிருக்கிறேன். இவ்வாறு அந்த கட்டுரையில் கூறப்பட்டுள்ளது.

நல்மருந்து 2.0 - சர்க்கரை நோயைக் கட்டுப்படுத்தும் மூலிகைகள்! - சந்தேகங்களும் விளக்கங்களும்! thanks vikatan.com

நல்மருந்து 2.0 - சர்க்கரை நோயைக் கட்டுப்படுத்தும் மூலிகைகள்! - சந்தேகங்களும் விளக்கங்களும்!

மைக்கேல் செயராசுஇ.கார்த்திகேயன்எல்.ராஜேந்திரன்

மருத்துவம் 13 - தெரிந்த செடிகள்… தெரியாத பயன்கள்!

ஆவாரை

ஒரு காலத்தில் மன்னர்கள், அவர்களைச் சார்ந்தவர்களுக்கு மட்டுமே சர்க்கரைநோய் இருந்தது. அதனால்தான் இதை ‘ராஜநோய்’ என்று பதிவுசெய்து வைத்துள்ளது சித்த மருத்துவம். பழங்காலங்களில் மன்னர் குடும்பத்தினர் மட்டும்தான் உடல் உழைப்பு இல்லாமல் உண்டு வந்தனர். நாட்டு விடுதலைக்குப் பிறகு எல்லோரும் இந்நாட்டு மன்னர் என்றாகிவிட்டதால், அனைவருக்குமே இந்த நோய் வரத் தொடங்கிவிட்டது. உடலுழைப்பு அவமானம் என்ற எண்ணமும், அதிக உணவும் நோய்களுக்கு வரவேற்பு வளையம் வைக்கின்றன.

வலிமை குறையச் செய்யும் மிகக்கொடிய நோய், சர்க்கரைநோய் என்பதைப் பதிவுசெய்து வைத்துள்ளது சித்த மருத்துவம். சர்க்கரைநோய்க்கு ‘மதுமேக சூரணம்’ அருமருந்து.

முன்னோர்கள் அதிகாலை 4 மணிக்கு எழுந்து, காலைக் கடன்களை முடித்துவிட்டு, பழைய கஞ்சிப் பானையைத் தலையில் சுமந்து வேலைக்குச் செல்வார்கள். உடல் வியர்க்க வேலையைச் செய்துவிட்டு, வெயில் ஏறியதும் கஞ்சியைக் குடித்துவிட்டு நிழலில் இளைப்பாறுவார்கள். மீண்டும் வேலையைத் தொடர்ந்து முடித்துவிட்டு, மாலை 4 மணிக்குள் குளித்துவிட்டு, தோட்டங்களில் விளைந்துகிடக்கும் காய்கறிகள், கீரைகளைப் பறித்துக்கொண்டு வீட்டுக்கு வருவார்கள். ஒரே வேளை சமையலாக அரிசி அல்லது சிறுதானியங்களைச் சோறாகவும், காய்கறிகள், கீரைகளைத் தொடுகறியாகவும் சமைத்து உண்பார்கள். மீத உணவில் தண்ணீர் ஊற்றி, மறுநாள் உணவாகத் தயார் செய்துவிட்டு இரவு 8 மணிக்கெல்லாம் உறங்கிவிடுவார்கள். அன்றைக்கு மின்சாரமும் டி.வியும் இல்லை.

உள்ளூர் வைரல் முதல் உலக டிரெண்ட் வரை உடனடியாக உங்கள் மெயிலில்!

Submit

அந்த வாழ்க்கை முறையில் ஒரு வேளைதான் சமையல், இருமுறைதான் உணவு. ஆனால், தற்போது காலை எழுந்தவுடன் நிறைய வெள்ளைச்சீனி போட்டு காபி, காலை உணவுக்கு இட்லி, தொட்டுக்கொள்ள மூன்று வகையான சட்னி.

11 மணிக்கு அதிக எண்ணெயில் சுட்ட வடை, அதிகச் சீனி போட்ட தேநீர், மதியம் இரண்டு மூன்று வகையில் நிறைய அரிசிச்சோறு. குறைவாகக் காய்கறிகள். மாலை 4 மணிக்கு மீண்டும் சிற்றுண்டி, ஒரு தேநீர். பிறகு, இரவு உணவு. இத்தனையும் போதாமல் படுக்கப்போவதற்கு முன்பு பெரிய வாழைப்பழத்துடன் ஒரு டம்ளர் நிறைய சீனி போட்ட பால். ஆக, ஒரு நாளைக்கு 9 முறை சாப்பிடுகிறோம்; அதுவும் அதிக கலோரி நிறைந்த உணவுப் பொருள்களை. அதே வேளையில், உடல் உழைப்பை விடுங்கள், நடைப்பயணமே இல்லாமல் ஆகிவிட்டது.

ஆவாரை - மருத மரம்

சித்தர்கள் கூறிய, ‘நாள் இரண்டு’ (உண்பது) என்பதைத் தொலைத்துவிட்டோம். அரிசி, வெள்ளைச் சீனி, வெள்ளை மாவு (மைதா) என நாடு முழுவதும் மாறிவிட்ட உணவுப் பழக்கவழக்கங்களும், உடல் உழைப்பற்ற வாழ்க்கைமுறையும்தான் சர்க்கரை நோயாளிகள் பெருகக் காரணம். பல்லாண்டுகளாக உடலமைப்பு மாறாமலிருக்கும் நபர்களை, ‘உடல் கட்டுவிடாமல் இருக்கிறார்’ என்று வாய்மொழியாகச் சொல்வோம். இந்தக் ‘கட்டு’ என்பது சித்த மருத்துவம் கூறும் ஏழு உடற்கட்டுகளைக் குறிப்பது. செந்நீர் (ரத்தம்), ஊன் (தலை), மூளை (மஜ்ஜை), கொழுப்பு, எலும்பு, சுக்கிலம், சுரோணிதம் ஆகியவைதான் ஏழு உடற்கட்டுகள். அத்தனை கட்டுகளையும் பாதிப்படையச் செய்து, வலிமை குறையச் செய்யும் மிகக்கொடிய நோய் சர்க்கரைநோய் என்பதைப் பதிவு செய்துவைத்துள்ளது சித்த மருத்துவம். சர்க்கரை நோயை, ‘மதுமேகம்’ என்றே சித்த மருத்துவம் குறிப்பிடுகிறது.

சித்த மருத்துவ நூல்கள், ஆவாரை ஒன்றையே மதுமேகத்துக்கான சிறந்த மருந்தாகக் கூறுகின்றன. ‘ஆவாரைப் பஞ்சாங்கம்’ என்று கூறப்படும் ஆவாரையின் வேர், பட்டை, இலை, பூ, காய் ஆகியவற்றுடன் மருதம்பட்டை, நாவல்பட்டை, கொன்றைப்பட்டை, கோரைக்கிழங்கு, பொன்குறண்டி கோட்டம் ஆகிய பொருள்களைச் சம எடை எடுத்துக் கலந்து, குடிநீரிட்டுக் குடித்துவர சர்க்கரைநோய் குணமாகும். குடிநீர் காய்ச்ச நேரமில்லை என்பவர்களுக்கு ‘மதுமேக சூரணம்’ அருமருந்து.

மருதமர இலை - நாவல் மரம்

மதுமேக சூரணம் செய்முறை

ஆவாரம்பூ, கடுக்காய்த்தோல், நெல்லி வற்றல் மூன்றும் வகைக்கு 200 கிராம், நாவல்கொட்டை, கீழாநெல்லி, கறிவேப்பிலை, சீந்தில் தண்டு, கோரைக்கிழங்கு வகைக்கு 100 கிராம் (இவை அனைத்தும் உலர்ந்தவையாக எடுத்துக்கொள்ள வேண்டும்) இவற்றை நன்கு பொடியாக்கிச் சலித்து வைத்துக்கொள்ளவும். சர்க்கரைநோய் என அறிந்தவுடன், இதில் 3-5 கிராம் (அரை முதல் ஒரு தேக்கரண்டி) எடுத்து காலை, மதியம், இரவு உணவுக்குப் பிறகு மூன்று வேளை வெந்நீர் அல்லது தண்ணீரில் கலந்து உண்டுவரச் சர்க்கரையின் அளவு விரைவில் கட்டுக்குள் வரும். தொடர்ந்து உண்டு வரவும். ஆனால், உணவுக் கட்டுப்பாடும் உடற்பயிற்சியும் மிகவும் அவசியம். இந்த மருந்துப் பொருள்கள்தான் வேறு வேறு ஆங்கிலப் பெயர்களில் மாத்திரைகளாக விற்பனைக்கு வருகின்றன.

கோட்டம்

இந்தச் சூரணத்தில் அளவு மிக முக்கியம். ஒரு மாத்திரையில் (கேப்சூல்) அதிகபட்சம் 400-500 மி.கி மருந்துதான் அடைக்க முடியும். நமக்குத் தேவையோ 3-5 கிராம். மேலும், மருந்து நமது உமிழ்நீருடன் கலந்து உடலுக்குள் செல்வதுதான் நல்ல பலனைக் கொடுக்கும். சர்க்கரைநோய்க்குக் கண்டிப்பாகச் சத்து மாத்திரைகள் எடுத்துக்கொள்ள வேண்டும் எனப் பரவலான ஒரு கருத்து நிலவுகிறது. நம் சித்த மருத்துவ மூலிகை மருந்தான மதுமேக சூரணத்தில் சர்க்கரைநோயை குணப்படுத்தும் ஆவாரம் பூவுடன், உடலுக்கு ஊட்டம் அளிக்கும் கோரைக்கிழங்கு, சீந்தில் தண்டு, சர்க்கரையின் தாக்கத்தைக் குறைக்கும் நாவல்கொட்டை, கல்லீரல் காக்கும் கீழாநெல்லி, கண்களைக் காக்கும் கறிவேப்பிலை, உடலை வளர்க்கும் கடுக்காய் மற்றும் நெல்லிக்காய் முதலான அனைத்துப் பொருள்களும் இருப்பதால் இது மிகவும் சிறந்த அமுதம்.

சர்க்கரைநோய் என்றால் ஆங்கில மருந்துகள் சாப்பிட்டால் மட்டுமே குணமாகும் என்ற பொய்யான கருத்து நிலவுகிறது. எனது 30 ஆண்டு மருத்துவ அனுபவத்தில், ரத்தத்தில் சர்க்கரை அளவு 500-க்கும் மேல் உள்ளபோது, முதலில் ஆவாரைக் குடிநீரை வழங்கி, சர்க்கரையின் அளவு 200 முதல் 300-க்கு வந்து, அதற்குப் பிறகு மதுமேக சூரணம், உணவுக் கட்டுப்பாடு, உடற்பயிற்சி மூலம் முற்றிலும் குணமானவர்களை நான் கண்டுவருகிறேன். சர்க்கரைநோயால் மிகவும் உடல் மெலிபவர்கள், ‘சீந்தில் உப்பு’டன் (முற்றிய சீந்தில் தண்டுகளைக் கொண்டு தயாரிப்பது) மதுமேக சூரணம் சாப்பிட்டுவருவது நல்ல பலன் தருகிறது. ‘குடிஜிசத்துவம்’ என்ற பெயரில் சீந்தில் உப்புக் கடைகளில் கிடைக்கிறது. சர்க்கரைநோய் அதிகமாகி சிறுநீரக பாதிப்பு ஏற்பட்டால், ஆவாரை வேர்ப்பட்டைக் குடிநீர் சிறந்த மருந்தாகும்.

இதய பாதிப்பு ஏற்படாமலிருக்க, இதய பாதிப்பைக் குறைப்பதற்கு ‘விளாம்பிசின்’ (விளா மரத்துப் பிசின்) சிறந்த மருந்து. இதைப் பொடி செய்து மதுமேக சூரணம் அல்லது ஆவாரைக் குடிநீருடன் சேர்த்துக் கொடுக்க நல்ல பயன் கிடைக்கும். இப்படிச் சித்த மருத்துவம் மிகவும் மேம்பட்ட, நவீன அறிவியலுடன் ஒத்துப் போகிற பல்வேறு அரிய முறைகளை வைத்திருக்கிறது. ஆனால், வாட்ஸ்அப்பிலும், ஃபேஸ்புக்கிலும் அறிவியல், மருத்துவ அனுபவம் இல்லாத பல்வேறு தகவல்கள் பகிரப்பட்டு வருகின்றன. எடுத்துக்காட்டாக, வெண்டைக்காயின் நுரையைச் சாப்பிட்டால் சர்க்கரைநோய் முற்றிலுமாகக் குணமாகும் என்றொரு பதிவு. எனவே, பதிவில் உள்ளது உண்மையா என்பதை ஆராய்ந்து பயன்படுத்துவது நல்லது.

சிறுகுறிஞ்சான் - இன்சுலின் செடி

சிறுகுறிஞ்சான் (அ) சர்க்கரைக்கொல்லி

இந்த இலையை வாயில் போட்டு சுவைத்துவிட்டு, சீனி அல்லது வெல்லத்தை வாயில் போட்டால் அவை இனிக்காது. காரணம், இலைகளில் உள்ள `குர்மரின்’ (Gurmarin) என்ற வேதிப்பொருள். நாவின் சுவை மொட்டுகளைச் சிறிது நேரம் செயலிழக்கச் செய்யும். சித்த மருத்துவப் பாடநூலான குணபாடம், கண்ணுசாமியின் பதார்த்த குண விளக்கம், சித்தர் இலக்கியங்களிலும் இது சர்க்கரைநோயைக் குணப்படுத்தும் என்று குறிப்பிடப்படவில்லை. ஆனால், நவீன அறிவியல் ஆய்வு முடிவுகள் இது சர்க்கரைநோயைக் கட்டுப்படுத்தும் என்பதை உறுதிசெய்கின்றன. ஆனால், இதை மட்டுமே சாப்பிட்டு சர்க்கரைநோயைக் கட்டுப்படுத்த முடியாது.

இன்சுலின் செடி

இது வெளிநாடுகளிலிருந்து அறிமுகமான தாவரம். இதன் இலையை அப்படியே சுவைத்துச் சாப்பிட்டால் சர்க்கரை அளவு மிகவும் வேகமாகக் குறையும். அதிக அளவில் உட்கொண்டால், ரத்தத்தில் சர்க்கரை அளவு அதிகமாகக் குறைந்து மயக்கம் ஏற்பட வாய்ப்பிருக்கிறது. இந்தச் செடி அப்போதைக்கு அப்போது சர்க்கரை அளவைக் குறைப்பதில் சிறந்தது. இதைப் பயன்படுத்துவதை நிறுத்தியவுடன் மீண்டும் சர்க்கரையின் அளவு அதிகரித்துவிடும்.

நாவல் - பொன்குறண்டி

நாவல்

நாவல் மரப்பட்டையும், பழத்தின் கொட்டையும் சர்க்கரைநோயைக் கட்டுப்படுத்தக்கூடியவை. இதில், பட்டையைக் குடிநீராகக் குடிப்பது நல்லது. பழக் கொட்டைகளை ஆடுதின்னாப் பாளைச்சாறு விட்டு அரைத்து, பட்டாணி அளவு உருண்டையாக உருட்டி, காயவைத்து உட்கொண்டு வந்தால், சிறுநீரில் சர்க்கரை அளவு குறையும். நாவல்பழச் சாறு சர்க்கரைநோயால், ஏற்படும் அதிக தாகத்துக்கு மிகவும் அருமையான மருந்து. இம்மரத்தின் வேர்ப்பட்டையை, சர்க்கரைநோயை குணப்படுத்தும் குடிநீர்களில் சேர்க்கிறார்கள்.

பொன்குறண்டி

இது மலைகளில் காணப்படும் மரம். இம்மரத்தின் வேர்ப்பட்டை பொன்போல மஞ்சள் நிறத்தில் இருப்பதால் இதற்கு, ‘பொன்குறண்டி’ என்று பெயர். இதை மலையாளத்தில் ‘ஏகநாயகம்’ என்பார்கள். இதைத் தனியாகப் பொடியாகவோ, பிற பொருள்களுடன் சேர்த்துக் குடிநீராகவோ செய்து உண்டுவர, ரத்தத்தில் சர்க்கரை அளவு நன்றாகக் குறையும். ஆவாரைக் குடிநீர் பாடலில், ‘கடலழிஞ்சில்’ என்று குறிப்பிடப்படுவது இதுதான். இதன் வேரைத் தோண்டி எடுப்பதால், இம்மர இனம் இன்று அழியும் நிலையில் உள்ளது.

‘‘ரத்தத்தில் சர்க்கரை அளவு 500-க்கும் மேல் உள்ளபோது, முதலில் ஆவாரைக் குடிநீரை வழங்கி, சர்க்கரையின் அளவு 200 முதல் 300-க்கு வந்து, அதற்குப் பிறகு மதுமேக சூரணம், உணவுக் கட்டுப்பாடு, உடற்பயிற்சி மூலம் முற்றிலும் குணமானவர்களை நான் கண்டு வருகிறேன்.’’

சர்க்கரைநோய்க்குக் கைப்பக்குவமாக எத்தனையோ மூலிகை மருந்துகள் சொல்லப்பட்டாலும், `வேர் பாரு, தழை பாரு, மிஞ்சினக்கால் பற்ப, செந்தூரம் மெல்ல மெல்ல பாரு பாரே...’ என்ற சித்த மருத்துவ வாக்குக்கேற்ப, மனித உடலின் ஏழு உடற்கட்டுகளையும் வலிமைப்படுத்தும் கந்தம், அயம், தங்கம், வங்கம், நாகம், தாமிரம் ஆகிய தாதுப் பொருள்களால் ஆன பற்பம், செந்தூரங்களை வழங்கி, சர்க்கரைநோயை முழுமையாக குணப்படுத்திவிட முடியும் என்று ‘தேரையர் மருத்துவப் பாரதம்’ கூறுகிறது. நோய்களை கெளரவர்களாகவும், மருந்துகளைப் பாண்டவர்களாகவும் உருவகித்து எழுதப்பட்டுள்ள தேரையரின் இந்த மருத்துவப் பாரத நூல், அனைத்து நோய்களுக்கும் நிரந்தரக் குணம் கூறுகிறது.

இயற்கை முறையில் மஞ்சள் பொடி Turmeric Powder without boiling

பசு மஞ்சளில் என்னென்ன சமைக்கலாம் Fresh Turmeric Root recipes

 

Advertisement

இன்று சித்த மருத்துவ தினம்
கத்தியம் என்பது ஒரு மரபு. இம்மரபின் முதல் சித்தர் அகத்தியர். உடல் கூறு, உடல் செயலியல், அறுவை, மனநோய், மந்திரம், தந்திரம், மருத்துவம், யோகம், நோய் கணிப்பு, தத்துவம், இலக்கணம் என அகத்தியர் பல்வேறு தமிழ் அறிவியல் தந்ததால் முதல் சித்தராக வணங்கப்படுகிறார். கம்போடியா, வியட்நாம் நாடு களிலும் அகத்தியரை பற்றிய குறிப்புகள் காணப்படுகின்றன. அகத்தியர் பிறந்த மார்கழி மாத ஆயில்ய நட்சத்திரமான இன்று (ஜன.,13) சித்த மருத்துவ தினம் கொண்டாடப்படுகிறது.


தமிழ் மருத்துவமாம் சித்த மருத்துவம் தொடாத அறிவியலே இல்லை. பண்டைய தமிழ் மருத்துவர்கள் அறுவை சிகிச்சை, உறுப்பு மாற்று, பிளாஸ்டிக் சர்ஜரி போன்றவற்றில் சிறப்புடன் விளங்கினர்.

அறுவை சிகிச்சை

7ம் நுாற்றாண்டில் மங்களபட்டி என்ற ஊரில் ராஜாவின் மகள் பிரசவிக்க முடியாமல் தலை திரும்பி கஷ்டப்படும்போது குழந்தையை உயிருடன் எடுத்து தர மங்களை என்ற மருத்துவச்சி முன்வந்தாள். தாயை ஒரு அறையில் வைத்து மகிழ்வூட்டும் அபினி, சாராயம் போன்ற மருந்துகளை கொடுத்து, வயிற்றைக் கிழித்து குழந்தையை உயிருடன் எடுத்து பழையபடி வயிற்றை தைத்து புண்ணை ஆற்றி தாயை பிழைக்க வைத்து அறுவை சிகிச்சை செய்தார். இதனை கொங்குசதகம் என்ற நுால் குறிப்பிடுகிறது.

போரினால் ஏற்பட்ட காயங்களை ஆற்ற வீரர்களின் மார்பு சதையை வெள்ளி ஊசி கொண்டு தையல் போடுவது தமிழர் வரலாற்றில் குறிப்பிடப்பட்டுள்ளது. ஊசி தோலின் வெளிப்புறத்திலிருந்து காயத்தின் உள்ளே சென்று குத்தி தைத்து வெளியே வரும்போது வெள்ளி ஊசியின் நிறம் சிவப்பாக மாறி இருக்கும். ஊசியின் நுனியில் தையல் நாரும் ஒட்டி வரும். இது பார்ப்பதற்கு மீனைக் கொத்திக் கொண்டு நீரில் இருந்து எழும் சிரல் என்ற மீன்கொத்திபோல இருக்கும் என்பதை “மீன்தேர் கொட்பிற் பனிக்கய மூழ்கிச் சிரல்-பெயர்ந் தன்ன நெடுவெள்சி” என்று பதிற்றுப்பத்து குறிப்பிடுகிறது.


தமிழ் மருத்துவத்தில் பழங்காலத்தில் வெட்டுப்பட்ட உறுப்புகள் மற்றும் சதையையும் தைக்கும் அறுவை தையல் முறை சிகிச்சை இருந்தது என்பதை அறிய முடிகிறது.மகளிர் செவிலியர் “மெல்இயல் மகளிர் நல்அடி வருட, செம்முகச் செவிலியர் கைம்மிக குழிஇ” என நெடுநல் வாடையும், “அஞ்சுவரு நோயோடு துஞ்சாததேனே” என அகநானுாறும் அழகிய இளம்பெண்கள் அரசியருக்கு உடலை மென்மையாக பிடித்து வருடும் தொக்கண சிகிச்சை செய்து துாங்க வைத்தனர் என தமிழ் மருத்துவத்தின் சிறப்பை வெளிப் படுத்துகிறது.

“நல்லாரிழிது சோ கவளம் வைத்துப் புதுமுகன் பாவை மார்பி ணெய்கிழி பயிலச் சேர்த்தி” என சீவக சிந்தாமணி பெண் செவிலியர்கள், காயமடைந்த போர்வீரர்கள் புண் ஆற்ற நெய்யால் செய்யப்பட்ட மருந்துகளை துணியில் தடவி கட்டு போட்டனர் எனக் குறிப்பிடுகிறது. மருத்துவப் புலவர்கள் சங்க காலத்தில் பல மருத்துவப் புலவர்கள் இருந்தனர். கடுகுபெருந்தேவனார், காபட்டனார், வெள்ளெருக்கிலையார், காரியாசான், மதுரை வேலாசான், சல்லியக்குமரன், மருத்துவன் தாமோதரனார், மருத்துவ நல்லச்சுதனார் போன்ற மருத்துவப் புலவர்கள் மருத்துவம் மற்றும் அறுவை சிகிச்சை செய்பவர்களின் மருத்துவ குறிப்புகளை பாடல்களாக தங்கள் நுால்களில் எழுதியுள்ளனர்.


தமிழ் மருத்துவர்கள்
சங்க கால தமிழ் மருத்துவர்கள் பல்வேறு பெயர்களால் அழைக்கப்பட்டனர். அறம் சார்ந்த முறையில் சிகிச்சை அளிப்பதால் அறவோன் என நற்றிணை, மெய்மையின் அடிப்படையில் சிகிச்சை வழங்குவதால் சான்றவர், துயரத்தை நீக்குவதால் அரஞர், நோய்களைக் களைவதால் களைநர் என கலித்தொகை, அறுவை சிகிச்சை மூலம் உடலில் தங்கியுள்ள அம்பு, வாள் போன்ற உலோகங்களை நீக்குவதால் சல்லியன் என திருமுக்கூடல் கல்வெட்டு, கசப்பான மருந்தைக் கூட தேன் சுவை மருந்தாக மாற்றி தருவதால் மருந்தாளர் என பெருங்கதை, மருந்துகளை உரைத்து வழங்குவதால் மருந்துறையோன், இன்னுயிரை காப்பதால் இன்னுயிர் போத்தர், தங்கள் அறிவுத் திறமையால் பல்வேறு இயற்கை பொருட்களை மருந்தாக மாற்றி தருவதால் அறிவனார் என சங்க நுால்கள் மருத்துவர்களின் வேறு பெயர்களை குறிப்பிடுகின்றன.


மருத்துவமனை மருத்துவமனை மருத்துவனில்லம் என்றும் ஆதுரகச் சாலை என்றும் குறிப்பிடப்பட்டுள்ளது. ஆதுரர் என்பவர் ஆதரவு அற்றவர். நோயினால் பீடிக்கப்பட்டவர். நோயினால் பீடிக்கப்பட்ட ஆதுரர் களை தங்கவைத்து கவனிக்கும் இடம் என்பதால் ஆதுரகச்சாலை என்று அழைக்கப்பட்டது. மருத்துவத்திற்காக வருடாந்திர பட்ஜட் போட்டு நிதி ஒதுக்குவது போல் ஆதுரகச் சாலையில் ஓர் ஆண்டுக்கான மருந்துகள் இருப்பில் வைக்கப்பட்டிருந்ததை சுந்தர சோழ விண்ணாசுர ஆதுரகச்சாலை பற்றிய திருமுக்கூடல் கல்வெட்டு குறிப்பிடுகிறது.

அறிவியல் மருத்துவம்
சங்ககால தமிழ் மருத்துவர்கள் போரில் அடிபட்ட காயங்களை தழும்பின்றி ஆற்றும் திறமை பெற்றிருந்தார்கள். “மருந்துகொள் மருந்தின் வாழ்வடு மயங்கி வடுவின்றி வரிந்த யாக்கையான்” என புறநானுாறு குறிப்பிடுகிறது. அத்திப்பாலைத் தடவி வடுவின்றி புண்களை ஆற்றும் பிளாஸ்டிக் சர்ஜரி சிகிச்சை முறையை தமிழ் மருத்துவத்தில் பயன்படுத்திய வழக்கம் கண்டறியப்பட்டுள்ளது.


பல்வேறு இலக்கிய நுால்களில் புண்களுக்கு பஞ்சு வைத்து கட்டி புண்களை ஆற்றுதல், உடலில் சென்று விட்ட உலோகத் துண்டுகளை காந்தம் மூலம் பிடித்து வெளியேற்றுதல், நோயாளிகள் தங்க வைக்கப்பட்டு இருக்கும் இடத்தில் வெண்கடுகை எரித்து புகை மூட்டுதல், வெண்கடுகுடன்நெய்யை சேர்த்து அரைத்து கிருமிகள் தொற்றா வண்ணம் நோயாளி உடல் மற்றும் அவர் தங்கியிருந்த இடங்களை சுத்தம் செய்தல் என தமிழ் மருத்துவம் அறிவியல் சார்ந்த மருத்துவ முறையாக தொன்று தொட்டு திகழ்ந்து வருகிறது.

உறுப்பு மாற்று சிகிச்சை
கம்பராமாயணத்தில் அனுமன் சீதையை பார்க்க பல்வேறு மலைகளை கடந்து செல்லும்போது பல்வேறு மருத்துவ முறைகள் அக்காலத்தில் தமிழ்க்குடி வழக்கில் இருந்ததை கம்பராமாயண அடிகளின் மருத்துப்படலத்தின் மூலம் கம்பர் விளக்குகிறார். உடம்பில் பாய்ந்த அம்பு, வாள் போன்ற ஆயுதங்களை கவனமாக நீக்கும் சல்லிய மருத்துவம், உடைந்து அல்லது கழன்றுபோன மூட்டு களை மறுபடியும் பொருத்தும் மூட்டு மாற்று சிகிச்சை, காயத்தினால் உடல் அழுகி உயிர் போகும் நிலையில் உயிரை மீட்டு தரும் அவசரகால மருத்துவம் மற்றும் விபத்தினால் உருக்குலைந்த தோல் காயங்களை ஆற்றி மறுபடியும் நன் நிறத்தை மீட்டுத்தரும் நெகிழுறுப்பு மருத்துவம் என்ற பிளாஸ்டிக் சர்ஜரி ஆகிய நான்கு வகை தமிழர் சல்லிய மருத்துவ முறையை குறிப்பிட்டுள்ளது வியக்கத்தக்கது.


உறுப்புகளை நீக்கிய பின்பு செயற்கை உறுப்புகளை பொருத்தும் சிகிச்சை முறைகளிலும் தமிழர்கள் சிறப்பு பெற்றிருந்தனர். தான் இழைத்த தவறுக்கு தனது கையை வெட்டிய பாண்டிய மன்னன் ஒருவன், அரண்மனை வைத்தியர்கள் மூலம் பொற்கையை பொருத்தி பொற்கை பாண்டியன் ஆனதை இலக்கியங்கள் சுட்டுகின்றன. மனநோய், அழகு மருத்துவம்பழங்காலத்தில் தமிழர்கள் உடல் மற்றும் மனநோய்களுக்கு சிகிச்சை அளித்தனர். “பையளும் சிறுமையும் நோயின் பொருள்” என உடலில் தோன்றும் நோயை பையள் என்றும் உள்ளத்தில் தோன்றும் நோயை சிறுமை என்றும் தொல்காப்பியம் குறிப்பிடுகிறது.


தமிழ் மருத்துவத்தில் அழகு சிகிச்சை பெரும் பங்கு வகித்தது. அரச குடும்பத்தைச் சார்ந்தவர்கள் மருந்துகளை பயன்படுத்தினர். பெண்களுக்கு அழகு சிகிச்சை செய்வதற்காக வண்ண மகளிரும், ஆண்களுக்கு அழகு சிகிச்சை செய்வதற்காக கோல வித்தகர்களும் இருந்ததாக பெருங்கதை குறிப்பிடுகிறது. சீவக சிந்தாமணியில் முகத்திற்கு அழகு செய்யும் தமிழ் மருத்துவ முறைகள், பெருங்கதையில் உதடுக்கு சாயம் இடும் தமிழ் மருந்துகள், நகம் வெட்டி அதனை அழகுபடுத்துவதற்காக செய்யும் பூச்சு முறைகளும் குறிப்பிடப்பட்டு உள்ளது.


கண்களுக்கு மையிட்டு அழகு படுத்தும் முறையை ஐங்குறு நுாறு மற்றும் புறநானுாறும், கூந்தலில் உள்ள பொடுகு, சிக்கு போன்றவற்றை நீக்க துாப புகை போடுதலை பதிற்றுப்பத்தும் குறிப்பிடுகிறது.

சித்தர்கள் கண்ட மெய்
அறிவியல் பல்வேறு ஓலைச் சுவடிகளிலும், குரு-சீடர் உபதேச மாகவும் சொல்லி வைத்தது, சித்த மருத்துவ நுாற்களாக இப்போது தொகுக்கப்பட்டுள்ளன. மெய்யியல் தமிழ் மருத்துவமே சித்த மருத்துவமாக இந்தியா மட்டுமின்றி பல்வேறு நாடுகளிலும் பிரபலமடைகிறது. சித்தமருத்துவம் நமது தாய் மருத்துவம். தாய் தன் குழந்தையை கண்ணும் கருத்துமாக பார்த்துக்கொள்வது போல் இம்மருத்துவம் நம்மை என்றென்றும் காக்கும்.
-டாக்டர் ஜெ.ஜெயவெங்கடேஷ்சித்த மருத்துவ எழுத்தாளர்மதுரை 98421 6756

'தை பிறந்தால், வழி பிறக்கும் தங்கமே தங்கம். thanks to dinamalar.com

'தை பிறந்தால், வழி பிறக்கும் தங்கமே தங்கம்...'
மார்கழி மாதத்தில், வாசலில் கோலம் போட்டு, மாட்டு சாணத்தில், பிள்ளையார் வைக்கும் பழக்கம், கிராமங்களில், இன்னமும் பல வீடுகளில் நீடித்து வருகிறது.
மார்கழிக்கு அடுத்து, தை பிறப்பதால், இந்த மாதத்தில் தான், திருமணங்கள் நிச்சயிக்கப்படும். ஒரு வீட்டில், திருமண வயதில், பெண்ணோ, பையனோ இருக்கின்றனரா, இல்லையா என்று தெரிந்து கொள்ள, நம் முன்னோர், மிக எளிய முறையை கடைப்பிடித்தனர்.
வீட்டு வாசலில், சாணி பிள்ளையாரில், அருகம்புல் வைத்திருந்தால், அந்த வீட்டில், திருமணமாகாத இளைஞர் இருக்கிறார் என்று பொருள். சாணி பிள்ளையாரின் தலையில், பூசணி பூ வைத்திருந்தால், திருமணமாகாத இளம் பெண் உள்ளதாக பொருள்.
அருகம்புல்லும், பூசணி பூவும் இணைந்து வைத்திருந்தால், அந்த வீட்டில், திருமணத்திற்கு, மணமகனும் - மணமகளும் இருக்கின்றனர் என்று பொருள்.
வெறும் சாணி பிள்ளையார் மட்டும் வைத்திருந்தால், அந்த வீட்டில், திருமணத்திற்கு காத்திருப்போர் யாரும் இல்லை என்று அர்த்தம்.
காலையில், அந்த வீட்டை கடந்து செல்வோர், வாசல் கோலத்தில், சாணி பிள்ளையார் தலையில் இருக்கும் பூவை வைத்தே, திருமண பேச்சு பேசலாமா, வேண்டாமா என்பதை முடிவு செய்வர்.
இப்படி, மார்கழி மாதத்திலேயே தயாராகி விட்டால், அடுத்து வரும், தை மாதத்தில், திருமணம் முடிவு செய்ய, உதவியாக இருக்கும். அதனால் தான், கிராமங்களில், 'தை பிறந்தால் வழி பிறக்கும்' எனும், பழமொழி உருவானது.
-சங்கமித்ரா நாகராஜன், கோவை.