Tuesday, December 3, 2019

குழந்தையில் பழகும் துாங்கும் பழக்கம் வாழ்க்கை முழுவதும் தொடரும் thanks to dinamalar.com

குழந்தையில் பழகும் துாங்கும் பழக்கம் வாழ்க்கை முழுவதும் தொடரும்

 


குழந்தைகளுக்கு துாக்கமின்மை பிரச்னை வருமா?
'என் குழந்தை, ராத்திரியில் துாங்கவே மாட்டேங்குது டாக்டர்' என்று சொல்லும் பெற்றோர், சமீபத்தில் அதிகரித்து உள்ளனர். குழந்தையின் ஆரோக்கியமான வளர்ச்சிக்கு, ஊட்டச்சத்து மிக்க உணவு, போதுமான அளவு தண்ணீர் எவ்வளவு முக்கியமான அடிப்படை தேவையோ, அதற்கு சற்றும் குறைந்தது இல்லை, குறிப்பிட்ட மணி நேர துாக்கமும். இதை, பெற்றோர் புரிந்து கொள்வதே இல்லை.





குழந்தைகளின் துாக்கமின்மைக்கு என்ன காரணம்?


திட்டமிட்டே எந்தக் குழந்தையும், துாக்கத்தை தவிர்ப்பது இல்லை. காலையில் சீக்கிரம் எழுந்து, பள்ளி செல்ல வேண்டிய கட்டாயம். மாலை வீடு திரும்பியதும், டியூஷன், சிறப்பு வகுப்புகளுக்கு செல்கின்றனர். அவற்றை முடித்து வீட்டிற்கு வந்ததும், மொபைல் போன், 'டிவி' ஆகியவற்றை பார்க்கின்றனர். நம்மை தொந்தரவு செய்யாமல் இருந்தால் சரி என, பெற்றோரும் கண்டு கொள்வதில்லை.அதன்பின், தாமதமாக இரவு உணவு சாப்பிட்டு, தாமதமாக துாங்கி, காலையில் சீக்கிரம் எழுந்திருக்க வேண்டும். இந்த பரபரப்பில், குழந்தைகளுக்கு போதுமான அளவு, துாங்குவதற்கு நேரமே இருப்பதில்லை.

இதனால் என்ன பிரச்னைகள் ஏற்படும்?
போதுமான அளவு துாக்கம் இல்லாத குழந்தையை, தினமும் குறிப்பிட்ட நேரம், ஆழ்ந்து உறங்கும் குழந்தைகளுடன் ஒப்பிட்டு பார்த்தாலே, வித்தியாசத்தை எளிதாக புரிந்து கொள்ள முடியும். துாக்கம் இல்லாவிட்டால், வகுப்பில் கற்றுக் கொள்வது, மனதில் நிற்காது; மறந்து விடும். கேட்கும் கேள்விகளுக்கோ, விருப்பங்களுக்கோ சரியான பதில் தர முடியாது; எதிலும் ஆர்வம் இருக்காது. எது கேட்டாலும் பொறுமையில்லாமல், எரிச்சலாக பதில் சொல்வர். விளையாட்டில் ஆர்வம் இருக்காது. பெற்றோர் மற்றும் உடன் பிறந்தவர்கள், நண்பர்களுடன் இணக்கமான உறவு இருக்காது.




ஆழ்ந்த துாக்கத்தால் ஏற்படும் பலன்கள்?


எப்போதும் சுறுசுறுப்பாக இருப்பர். எந்த விஷயத்தையும் கற்றுக் கொள்வது சுலபம். நோய் எதிர்ப்பு சக்தி அதிகரிக்கும். பருவ நிலை மாற்றங்களால் ஏற்படும் காய்ச்சல், சளி போன்ற தொற்றுகளை எதிர்த்து போராடும் வலிமை கிடைக்கும்; கற்பனை திறன் அதிகரிக்கும். எப்போதும், குழந்தைகளின் இயல்பான, உற்சாக மனநிலையில் இருப்பர். அவர்களுக்கு ஏற்படும் பிரச்னைகளை, அவர்களே சுலபமாக தீர்த்துக் கொள்ளும் திறன் வளரும்.

எத்தனை மணி நேரம் துாக்கம் அவசியம்?
மூன்று முதல் ஐந்து வயது வரையுள்ள குழந்தைகள், பதினொன்று முதல், பதின் மூன்று மணி நேரம் துாங்க வேண்டும். ஐந்து முதல் எட்டு வயதிற்கு, பத்து முதல், பதினொன்று மணி நேரம் துாக்கமும், ஒன்பது முதல் பதினொன்று வயது வரை, ஒன்பது முதல் பதினொன்று மணி நேரமும், வளர் இளம் வயதான, பதின்மூன்று முதல் பதினேழு வயது வரை, ஒன்பது முதல் பத்து மணி நேர துாக்கமும் அவசியம். துாக்கம் என்றால், இரவு முழுவதும் இடையில் எழுந்திருக்காமல், ஆழ்ந்து துாங்க வேண்டும்.

ஆரோக்கியமான துாக்கத்திற்கு வழி முறைகள்?
குறிப்பிட்ட நேரத்தில் துாங்கி, குறிப்பிட்ட நேரத்தில் எழுந்திருக்க பழக்க வேண்டியது முக்கியம். அதிகபட்சம், 9:00 மணிக்கு முன், குழந்தைகளை துாங்க வைத்து விட வேண்டும். துாங்குவதற்கு இரண்டு மணி நேரத்திற்கு முன், இரவு உணவை கொடுத்து விட வேண்டும். துாங்கப் போகும் முன், பசித்தால் பால் தரலாம்.மாலை நேரத்தில், ஒரு மணி நேரம் விளையாட அனுமதிப்பது, துாங்குவதற்கு இரண்டு மணி நேரத்திற்கு முன், மொபைல்போன், 'டிவி' போன்ற மின் சாதனப் பொருட்களை தராமல் இருப்பது மிகவும் முக்கியம்.

படுக்கை அறை, விரிப்புகள், திரைச்சீலைகள், போர்வை போன்ற, குழந்தைகள் பயன்படுத்தும் அனைத்தும், சுத்தமாக இருக்க வேண்டும். படுக்கை அறை, சத்தம் இல்லாமலும், இருட்டாகவும் இருப்பது முக்கியம். அவசியம் இருந்தால், 'ஜீரோ வாட்ஸ்' விளக்குகளை பயன்படுத்தலாம். குழந்தைகளுக்கு பய உணர்வு இல்லாமல், பாதுகாப்பாக துாங்குவதற்கான சூழலை உருவாக்கி தர வேண்டும். குழந்தை பருவத்தில் உருவாகும் துாங்கும் பழக்கம், வாழ்க்கை முழுவதும் வரும் என்பதை மறந்துவிடக் கூடாது.

டாக்டர் லலிதா ஜானகிராமன்குழந்தைகள் நல மருத்துவர், சென்னை.)044 - 4200 1800

Saturday, November 30, 2019

டெங்கு' காய்ச்சலுக்கு மூலிகைகள் thanks dinamalar.com


பீஹார் மாநிலத்தில் ஒரு கிராமத்தில், 50 ஆண்டுகளுக்கு முன் நடந்த உண்மை சம்பவம் இது. முதியவர் ஒருவர், காட்டில் தினமும் ஆடு, மாடுகளை மேய்த்துக் கொண்டிருப்பார். ஒரு நாள், காலில், 'நறுக்'கென ஏதோ குத்தியது போல உணர்ந்தார்; குனிந்து பார்த்த போது, ரத்தம் வடிந்து கொண்டிருந்தது.ஏதோ பூச்சி கடித்து விட்டது என நினைத்து, சுற்றும் முற்றும் பார்த்த போது, சில அடி துாரத்தில், கருநாகப் பாம்பு சுருண்டு, நெளிந்து கொண்டிருந்தது.உடனடியாக, பக்கத்திலிருந்த வேப்ப மர இலைகளை பறித்து, அப்படியே வாயிலிட்டு மென்று விழுங்கினார்.
கடிபட்ட இடத்தின் மீது, வாயில் இருந்த சாற்றை பூசினார்.கருநாகப்பாம்புசில நிமிடங்கள் கழித்து பார்த்த போது, அந்த கருநாகப் பாம்பு செத்துக் கிடந்தது. அதை ஒரு கம்பில் துாக்கியபடி, ஊருக்குள் சென்றார். மக்கள், இவர் கையில் உள்ள கருநாகப் பாம்பை பார்த்து, என்ன, ஏது என விசாரிக்க, நடந்ததை விவரித்தார்.சில நாட்கள் கழிந்தன. அதன் பிறகும் அந்த முதியவருக்கு ஒன்றும் நேரவில்லை. பாம்பு கடித்தும் ஒன்றும் ஆகாத அந்த முதியவர் பற்றி அறிந்த நிருபர்கள், அவரை தேடி, பேட்டி எடுத்தனர்.'பாம்பு கடித்த பிறகும், எப்படி நீங்கள் பாதிப்பின்றி இருக்கிறீர்கள்; உங்களை கடித்த பாம்பு, இறந்தது எப்படி?' என, அடுக்கடுக்காக கேள்வி கேட்டனர்.
படிப்பறிவு சிறிதும் இல்லாத அந்த பெரியவர் கூறியதாவது:இந்த காட்டில் தான், 40 - 50 ஆண்டுகளாக ஆடு, மாடு மேய்த்து வருகிறேன். என் அம்மா, 'காட்டில் விஷப்பூச்சிகள் நடமாட்டம் அதிகம் இருக்கும். அவை கடித்து விட்டால், பாதிப்பு ஏற்படாமலிருக்க, சர்ப்பகந்தா, நிலவேம்பு, மலைவேம்பு செடிகளின் இலைகளை பறித்து சாப்பிடு' என்பார்.
அதன்படி, அவற்றில் ஏதாவது ஒரு மூலிகையை தினமும் பறித்து சாப்பிடுவேன். என் ரத்தத்தில் கலந்திருந்த, மூலிகைகளின், விஷ முறிப்பு சக்தி தான், பாம்பு கடித்த பிறகும் நான் சாகாததற்கு காரணம். என் உடலில் சேர்ந்திருந்த அந்த சக்தி தான், என்னைக் கடித்த பாம்பையும் கொன்றது.இவ்வாறு அவர் கூறினார்.இதிலிருந்து நாம் பெற வேண்டிய தகவல், உடம்பில், நோய் மற்றும் விஷம் எதிர்ப்பு சக்தி இருக்குமானால், கொடிய நாகப் பாம்பின் விஷம் கூட முறிந்து விடும்; கடித்த பாம்பும் இறந்து விடும் என்பதாகும்.இந்த முதியவர் உண்ட மூலிகைகளான, மலை வேம்பு, சர்ப்பகந்தா, நிலவேம்பு போன்றவை, தமிழக சித்தர்களின், மூலிகை மருத்துவத்தில் மிகச் சிறந்த நஞ்சு முறிப்பு மூலிகைகளாக பயன்படுத்தப் படுகின்றன.பல நுாறு ஆண்டுகளாக, மக்களை விஷக்கடிகளிலிருந்து மீட்ட, இந்த மூலிகைககள் தான், மனித குலத்தின் உண்மையான மெய்க்காப்பாளர்கள்.ஆனால், இவை பற்றிய வரலாற்று பதிவுகள், கிராமத்து கதைகளாகவும், பாடல்களாகவும், பழமொழிகளாகவும் இருப்பதால் அழிந்து வருகின்றன. இவற்றை ஆராய்ந்தாலே, 'டெங்கு' காய்ச்சல் மட்டுமல்ல, புற்றுநோய்க்கும் கூட மருந்து கண்டுபிடிக்க முடியும் என்பது, என் எண்ணம்.

அந்த வகையில், 2006 - 2007ல் நான் அறிமுகப்படுத்திய, நிலவேம்பு கஷாயம், இன்று, டெங்கு காய்ச்சலுக்கு நல்ல தீர்வை அளிக்கிறது என்பது, அனுபவ உண்மையாகி உள்ளது. எனினும், அதற்கான, இன்றைய நவீன ஆய்வு விளக்கம், இதுவரை கண்டுபிடிக்கப்படவில்லை என்பது நம் அலட்சியமாகும்.நோய் எதிர்ப்புச் சக்தி நிலவேம்பு கஷாயத்தை, கொசு உற்பத்தியாகும் இடத்தின் மீது, 'ஸ்பிரே' செய்தாலே போதும்; டெங்கு காய்ச்சலை உண்டாக்கும் கொசு உற்பத்தி குறையும். இனியாவது நிலவேம்பு, மலைவேம்பு, மாவிலை, நொச்சியிலையை கஷாயம் செய்து குடிப்பது போல, கொசு உற்பத்தியாகும் இடங்களில், ஸ்பிரே செய்யவும் வேண்டும்.அதுபோல, வேப்பெண்ணெயில், 'லெமன் கிராஸ் தைலம்' கலந்து, ஸ்பிரே செய்தாலும் கொசுக்கள் பரவாது.

மூலிகைகளை அருந்தி கிடைத்த நோய் எதிர்ப்பு சக்தியால், ரத்தத்தை வலுப்படுத்திக் கொண்டால், நம்மை கொசு கடித்தாலும் இறந்து விடும்.நிலவேம்பு, மலைவேம்பு, வில்வம், அருகம் புல், சீந்தில், நெல்லி, மஞ்சள், கண்டங்கத்திரி, சுக்கு, மிளகு, பற்பாடகம், விஷ்ணு கரந்தை, கோரைக்கிழங்கு, சந்தனம், சித்தாமுட்டி, சித்திரமூலம், தாமரை போன்ற மூலிகைகளை அவ்வப்போது சாப்பிட்டு வந்தாலே போதும்; நோய் எதிர்ப்பு சக்தி கிடைக்கும். இவை, பக்க விளைவு தராத நல்ல மூலிகைகள். மேற்கண்ட மூலிகைகளை, ஒரு ஆய்வுத் திட்டமாக உருவாக்கி, 'அலோபதி' எனப்படும் ஆங்கில மருத்துவர்களும், சித்த மருத்துவ நிபுணர்களும் இணைந்து, 'காய்ச்சலை ஒழிக்கும் மூலிகைகள்' என்ற தலைப்பில், ஆய்வு திட்டத்தை மேற்கொண்டால், டெங்கு காய்ச்சலை முற்றிலும் தடுக்கலாம்.இந்த ஆய்வுகளை, தனி மனிதனாக நான் மட்டுமே செய்ய முடியாது. சென்னையில் உள்ள, எம்.ஜி.ஆர்., மருத்துவ பல்கலைக் கழகத்தின், மருந்து ஆய்வுதுறை, தாம்பரத்தில் உள்ள, தேசிய சித்தா மருத்துவ கல்வி நிறுவனம் ஆகிய நிறுவனங்கள், இதை ஆய்வு திட்டமாக ஏற்று, ஆய்வு மேற்கொண்டால், மூலிகைகளின் தெய்வீக குணங்கள், பல நோய்களுக்கு மருந்தாகும்.நில வேம்புக் குடிநீர்அதுவரை பொதுமக்கள் அறிய வேண்டிய சில தகவல்கள்:நான் அறிமுகம் செய்த நில வேம்பு கஷாயம், இன்று நன்கு பயனாகி வருகிறது என்றாலும், இது மட்டுமே போதாது. பின் வரும், மூலிகை மருந்துகளையும் மக்கள் பயன்படுத்தலாம். விஷ்ணு கரந்தை - இதை தினசரி கஷாயம் போட்டு சாப்பிடலாம் சீந்தில் - இதையும் கஷாயமாக அருந்தலாம் பற்பாடகம் - இதையும் உலர்த்திப் பொடி செய்து, கஷாயம் செய்து அருந்தலாம் மலை வேம்பு - தினமும், ௧௦ - ௨௦ இலைகளைப் பறித்து, ௧௦ மிளகு சேர்த்து அரைத்து, ஒரு வேளை சுடு தண்ணீருடன் அருந்தலாம் கருந்துளசி - அரை பிடி எடுத்து, ஒன்றரை குவளை கொதி நீரில் போட்டு கஷாயமாக்கி கொதிக்கும் போது, கிராம்பு - ௫, மிளகு - ௧௦ சேர்த்து காய்ச்சி வடிகட்டி, தேன் ௨ ஸ்பூன் கலந்து, காலை - மாலை பருகலாம் வில்வம், வன்னி ஆகிய இரு மூலிகை இலைகளைப் பறித்து, உலர்த்திப் பொடி செய்து, அரை ஸ்பூன் எடுத்து, ஒரு குவளை கொதி நீரில் போட்டு, கஷாயம் செய்து பருகலாம்.சென்னை, அடையாறில் உள்ள, இந்திய மருத்துவ உற்பத்தி சங்கம் எனப்படும், 'இம்ப்காப்ஸ்' கடந்த, ௭௫ ஆண்டுகளாக, நம் பாரம்பரிய மருந்துகளை தயாரித்து வருகிறது. அங்கிருந்து, சுதர்சன சூரணத்தை வாங்கி, தினமும் காலை, மாலை, அரை ஸ்பூன் எடுத்து, வெதுவெதுப்பான நீரில் பருக வேண்டும்.மேலும், தாளிசாதி சூரணம் என்ற மூலிகை மருந்தை, காலை, மாலை, அரை ஸ்பூன் தேனுடன் குழைத்து சாப்பிடலாம்.வசந்த குசுமாகரம் என்ற சித்த மருந்தை, காலை ஒன்று, இரவு ஒன்று என எடுத்து, வெற்றிலையுடன் சேர்த்து, தேன் ஒரு ஸ்பூன் கலந்து சாப்பிட, டெங்கு காய்ச்சல் ஓடியே போய் விடும்.எனினும், இந்த மருந்துகளை, சித்த மருத்துவர் ஆலோசனைபடி எடுத்துக் கொள்வது நல்லது!தொடர்புக்கு: ௯௦௦௩௦ ௩௧௭௯௬

Sunday, November 3, 2019

குழந்தைகளுக்கு மலச்சிக்கல் ஏற்படுவது ஏன்? thanks dinamalar.com

குழந்தைகளுக்கு மலச்சிக்கல் ஏற்படுவது ஏன்?
Advertisement
 
 
 
Advertisement
 
எழுத்தின் அளவு:

பதிவு செய்த நாள்

01நவ
2019
00:00
உணவு பழக்க மாற்றம், குழந்தைகளின் உடல் நலத்தை பாதித்துஉள்ளதா?
பள்ளி செல்லும் வயதில் உள்ள, 7 - 12 வயது குழந்தைகளில், 25 சதவீதம் பேருக்கு மேல், மலச்சிக்கல் பிரச்னை உள்ளது. இதற்கு, உடல்ரீதியில் பல காரணங்கள் இருந்தாலும், மாவுச்சத்தும், சர்க்கரையும் அதிகமாக உள்ள துரித உணவுகளை சாப்பிடுவதே, பொதுவான காரணம். ஏழு வயதிற்கு குறைந்த குழந்தைகளுக்கும், இப்பிரச்னை அதிகரித்து உள்ளது.

பிரச்னைக்கு உடல் ரீதியான காரணங்கள் என்ன?
குடல் அடைப்பு, நரம்பு மண்டலத்தில் ஏற்படும் பாதிப்பு, ஆசனவாய் அமைப்பில் ஏற்படும் மாற்றங்கள், பெருங்குடலில் உள்ள நரம்பு மண்டல பாதிப்புகள் போன்ற, பிறவியிலேயே ஏற்படும் குறைபாடு களால், இந்தப் பிரச்னை வரலாம். 'மெட்டபாலிசம்' என்று சொல்லப்படும், உடல் உள் செயல்பாடுகளில் ஏற்படும் மாற்றங்களாலும், மலச்சிக்கல் பிரச்னை வரலாம்.மிகவும் கெட்டியான மலம், ஆசனவாய் வழியே வரும் போது, அந்த இடத்தில் புண் ஏற்படும். அடிக்கடி இது போல ஏற்பட்டால், வலிக்கு பயந்து, குழந்தைகள் மலம் கழிப்பதைத் தவிர்க்க முற்படுவர். எனவே, மலம் பெருங்குடலிலேயே தங்கி விடும். தைராய்டு ஹார்மோன் அளவு குறைவாக சுரப்பதாலும், ரத்தத்தில் கால்சியம் அளவு அதிகமாக இருந்தாலும், இப்பிரச்னை வரும்.பிறவியிலேயே ஏற்பட்டுள்ள குறைபாடுகளை, அறுவை சிகிச்சை மூலமும், மற்ற பிரச்னைகளை, சரியான மருந்துகள் தருவதாலும் சரிசெய்ய முடியும்.

இதனால் மனநல பாதிப்புகள் ஏற்படுமா?
தினமும் மலம் கழிக்காவிட்டால், பெருங்குடலில் வாயு உற்பத்தி ஆகும். இது மிகவும் ஆபத்தானது. இந்த வாயு, அப்படியே தங்கி, ரத்தத்தில் கலந்து, எந்த விஷயத்திலும் முழு ஈடுபாடு இல்லா மனநிலையை ஏற்படுத்தும். இப்பிரச்னை உள்ள குழந்தைகள், வகுப்பில், கொட்டாவி விட்டபடி, சோம்பலாக இருப்பர். இவர்களால், பாடங்களில் கவனம் செலுத்த முடியாது. பிரச்னை வந்த பின், மனதளவில் ஏற்படும் மாற்றம் இது.மற்றொரு புறம், மனநிலையில் ஏற்படும் மாற்றங்களாலும், பழக்கத்தினாலும், 95 சதவீதம் குழந்தைகளுக்கு, இப்பிரச்னை ஏற்படுகிறது. மன பதற்றம், மன அழுத்தம் போன்றவையும் அரிதாக ஏற்படலாம்.பெற்றோரிடையே ஏற்படும் சண்டை, விவாதங்கள், கருத்து மாறுபாடுகளால் சத்தம் போடுவது, குழந்தைகளின் மனதில், அச்சத்தையும், பாதுகாப்பின்மையையும் ஏற்படுத்தும். இதனாலும், மலச்சிக்கல் ஏற்படலாம்.

உணவு பழக்கம் எப்படி இருக்க வேண்டும்?
அதிக நார்ச்சத்து உள்ள, கீரை, காய்கறி, பழங்கள், தினமும் சாப்பிட வேண்டியது அவசியம். அதிகமாக, மைதா மாவு சேர்ப்பது, நீர்ச்சத்து உறிஞ்சப்பட்டு, மலம் கெட்டியாகி விடுகிறது.பால் வகை பொருட்கள், வறுத்த, பொரித்த உணவுகளை, குழந்தைகளுக்கு தருவதை தவிர்க்க வேண்டும்.பிஸ்கெட், சாக்லெட் போன்ற அதிக சர்க்கரை, மைதா உள்ள உணவுகளுக்கு பதிலாக, நம் வழக்கத்தில் உள்ள பாரம்பரிய உணவுகளை, சாப்பிட பழக்குவது நல்லது. திரவ உணவுகளை அதிகம் எடுத்துக் கொள்வதற்கும், குழந்தையை பழக்க வேண்டும்.

பழக்கத்தினால் பிரச்னையை எப்படி தவிர்க்கலாம்?
பெற்றோரின் பங்கு மிகவும் முக்கியமானது. இரவில், அதிகபட்சம், 9:00 மணிக்குள் துாங்க வைத்து, அதிகாலையில் எழுந்திருக்கும் பழக்கத்தை, குழந்தைகளிடம் ஏற்படுத்த வேண்டும். காலையில் எழுந்ததும், கழிப்பறைக்கு செல்லும் பழக்கத்தை கற்றுத்தர வேண்டியது அவசியம். குறிப்பாக, இந்திய அமைப்பில் உள்ள, 'டாய்லெட்'டை பயன்படுத்த, பழக்க வேண்டும். இதனால், குழந்தைக்கு, அடிவயிற்றில் நன்கு அழுத்தம் ஏற்பட்டு, மலம் எளிதாக கழிக்க வாய்ப்பு ஏற்படும்.

டாக்டர் கே. சரவணபவன்
குழந்தைகள் நல மருத்துவர்,
சென்னை
98412 89896

Sunday, September 29, 2019

சுண்டல் thanks dinamalar/com

சுண்டல்

 பதிவு செய்த நாள் : செப் 30, 2019 |  கருத்துகள் (1)
Advertisement
 சுண்டல்
சுண்டலில் உள்ள சத்துகள்; யாரெல்லாம் சாப்பிடலாம்; சுண்டல் சாப்பிட்டால், வாய்வு கோளாறு வருமா என்பதை கூறுகிறார், உடல் எடை குறைப்பு நிபுணர், எஸ்.டி.வெங்கடேஷ்வரன்: யாருக்கெல்லாம் செரிமானக் கோளாறு இருக்கிறதோ; செரிமானத் தன்மை குறைவாக இருக்கிறதோ; புரதச் சத்தை செரிக்கக் கூடிய அமிலங்களின் சுரப்பு குறைவாக இருக்கிறதோ, அத்தகையோர், சுண்டல் சாப்பிடக் கூடாது. அதுபோல, வயது முதிர்ந்தவர்கள், சுண்டல் சாப்பிடக் கூடாது. முழங்கால் வலி, மூட்டு வலி உள்ளவர்கள், வயிறு உப்புசம் உள்ளவர்கள், வயிற்றில் வாய்வு தொல்லை உள்ளவர்கள், சுண்டல் சாப்பிடுவதைத் தவிர்க்க வேண்டும். சர்க்கரை நோயாளிகள், சுண்டலை மிகக் குறைந்தளவு எடுத்துக் கொள்ள வேண்டும். ஏனெனில், சுண்டலில் உள்ள, 'கிளைசமிக் இன்டக்ஸ்' ரத்தத்தில் உள்ள சர்க்கரையின் அளவை உடனடியாக அதிகரிக்கும். இதனால், வெறும் வயிற்றில், சுண்டல் சாப்பிடக் கூடாது.
சுண்டல் சாப்பிட வேண்டும் என்ற ஆசை இருந்தால், கிளைசமிக் இன்டக்ஸ் குறைவாக இருக்கும், சோயா மற்றும் ராஜ்மா சுண்டலை கொஞ்சமாக சாப்பிடலாம். சரி, வாய்வுக் கோளாறு இருக்கிறது என்பதை எப்படி அறிந்து கொள்வது என்றால், உடலில் ஆங்காங்கே குத்துவது, பிடித்துக் கொள்வது போன்ற உணர்வு இருந்தால், அறிந்து கொள்ளலாம். அதை வைத்து, வாய்வுக் கோளாறு என்பதை அறியலாம். அத்தகையோர், சுண்டல் சாப்பிட்டதும், ஒரு ஸ்பூன் பெருங்காயத் துாளை, ஒரு டம்ளர் வெந்நீரில் கலந்து குடித்தால், வாய்வுக் கோளாறில் இருந்து விடுபடலாம்.அதுபோல, சுண்டல் சாப்பிட்ட பின், நாட்டுப்பூண்டில், ஆறு பல் எடுத்து, தண்ணீரிலோ அல்லது பாலிலோ வேக வைத்து, ஆறிய பின் குடிக்கலாம். மேலும், சீரகப் பொடி, மிளகு, இஞ்சி, சுக்கு மல்லி காபி அருந்துவதால், வாய்வுக் கோளாறில் இருந்து தப்பிக்கலாம்.செரிமானக் கோளாறு உள்ளவர்களுக்கு, சுண்டல் சற்று சிரமத்தை கொடுக்கும். ஏனெனில், சுண்டலை தோலோடு சேர்த்து சாப்பிடும் போது, தோலில் உள்ள, 'பைபர்' செரிமானக் கோளாறை ஏற்படுத்தும். இதனால், வாய்வுக் கோளாறு ஏற்படும்.இதை சரி செய்ய, சுண்டலுடன் பூண்டு சேர்த்துக் கொள்ளலாம் அல்லது சுண்டலுடன் சிறிதளவு பெருங்காயத்துாள் சேர்த்து சாப்பிடலாம்.
சுண்டலை மெதுவாக சாப்பிட வேண்டும். கொஞ்சம் கொஞ்சமாக பொறுமையுடன் மென்று சாப்பிடும் போது, சாப்பிடும் உணவு நன்றாக உள்ளிழுக்கப்படுகிறது. அதனால், வயிறு நன்றாக நிறையும். சத்துகளும் உடலில் முழுமையாக சேர்கின்றன. சுண்டலில் கார்போஹைட்ரேட், புரதச்சத்து, நார்ச்சத்து மற்றும் அத்தியாவசியமான அமினோ ஆசிட்கள் உள்ளதால், அவை உடலுக்குள் மெல்ல செல்வதால், சக்தி கொஞ்சம் கொஞ்சமாக அதிகரிக்கும். இது, நல்லது!

Tuesday, June 18, 2019

வாங்க சாப்பிடலாம்... இன்று சர்வதேச நீடித்த அறுசுவை உணவு தினம் thanks to dinamalar.com


வாங்க சாப்பிடலாம்... இன்று சர்வதேச நீடித்த அறுசுவை உணவு தினம்

 Added : ஜூன் 18, 2019 
5Shares

“வயிற்றுக்குசோறிடல் வேண்டும்- இங்கு
வாழும் மனிதருக்கெல்லாம்”
என்பான் மகாகவி பாரதி. இந்த அழகிய உலகம் இயல்பாகச் சுழல வேண்டும் என்றால் அது பசிப்பிணி இல்லாத உலகமாக மாறவேண்டியது அவசியம். மனிதனின் அடிப்படைத் தேவைகளுள் முதன்மையானது உணவேஆகும். தமிழரின் பண்பாட்டை ஒற்றை வார்த்தையில் கூற வேண்டும் என்றால் இலக்கியங்கள் அனைத்தும் ஒரு சேர எழுப்பும் குரல் விருந்தோம்பல் என்பதே ஆகும். சர்வதேச நீடித்த அறுசுவை உணவு தினத்தை இன்று ( ஜூன்18) உலகமெங்கும் கொண்டாடிவருகின்றனர். 2016 ஆம் ஆண்டு ஐ.நா. சபையால் அங்கீகரிக்கப்பட்ட பின்னர் ஆண்டுதோறும் இந்த தினம் உலக அளவில் உணவுப் பிரியர்களால் சிறப்பாக கொண்டாடப்பட்டுவருகிறது.
இன்றைய நவீன உலகில் உணவின் வகைகளும் அவற்றின் பெயர்களும் ஏராளமாக இருந்தாலும் எத்தகைய உணவு தயாரித்தாலும் அது அறுசுவைக்குள் தான் இருக்கும் என்பதே நமது முன்னோர்கள் வகுத்த நியதியாகும். ஆறு சுவைகளுடன் கூடிய உணவே முறையான உணவு என்று தமிழ் இலக்கியம் கூறுகிறது. நாக்கு அறியக் கூடியசுவை ஆறு என்று தமிழ் மருத்துவமும் கூறுகிறது. நவீன மருத்துவமோ ஆயிரக்கணக்கான சுவை நிறமிகள் நமது நாக்கிலே குடிகொண்டுள்ளதாக கூறுகிறது. உடலை இயக்குகின்ற தாதுக்களுடன் அறுசுவையும் இணைந்து நமது உடலை திடமாக வைக்க உதவுகிறது. ரத்தம்,தசை,கொழுப்பு,எலும்பு,நரம்பு,உமிழ்நீர்என்ற ஆறு தாதுக்களால் ஆனதே இந்தஉடலாகும். இந்த ஆறு தாதுக்களும் சரியானஅளவில் உடலில் இருக்கவேண்டும். அவற்றைசரிவர இருக்கச் செய்வது இந்தஅறுசுவையே ஆகும்.
உயிர்வாழ உணவு

'யாகவராயினும் நா காக்க' என்பான் வள்ளுவன். இது வெறும் நாவடக்கம் என்பதற்காக மட்டும் அவன் கூறியதாக நாம் எடுத்துக் கொள்ளக்கூடாது. ஆறு சுவைகளுடன் கூடிய உணவினை நமது நாக்கு சுவைத்தே உள்ளே அனுப்பி வைக்கிறது. அதில் ஏதேனும் ஒருசுவை அதிகமானாலும் அது நமக்கு தீங்கையே தருகிறது. உண்ணும் உணவிலும் கவனம் தேவை என்பதையும் கருத்திலே கொள்ள வேண்டும். சுவைகளில் தலைமையானது உப்பு.உயிர்வாழ உணவு அவசியம்; அந்த உணவினை நல்ல உணர்வோடு உண்பது அவசியம் என்பதே மூதாதையர்களின் கருத்து. தமிழ்ப் பண்பாட்டின் அடிநாதமே விருந்தோம்பல் என்ற உயரிய பண்பிலிருந்தே தொடங்குகிறது. வீடுகள் தோறும் திண்ணைகள் அமைத்து வழிபோக்கர்கள் அதில் தங்கிச் செல்ல வழிவகை செய்து, அங்கிருக்கும் மாடங்களில் உணவும் தண்ணீரும் வைத்து விருந்தோம்பல் செய்த இனம் நம்முடையது.இறக்கும்போது கூட யாரும் பசியோடு இறந்திடக் கூடாது என்பதால்தான் அவர்களுக்கு வாய்க்கரிசி போடும் வழக்கமே வந்தது. நம்முடைய வீடுதேடி வரும் விருந்தினர்களை மனம்கோணாமல் அவர்களுக்கு என்ன உணவு பிடிக்கும் என்பதை அறிந்து அதை அவர்களுக்கு சமைத்து பரிமாறி மகிழ வேண்டும் என்பதை இலக்கியங்களும் பேசி மகிழ்கின்றன. பெரியபுராணம் முழுக்கவே பல்வேறு இடங்களில் அடியவர்களுக்கு விருந்து படைப்பதையே சேக்கிழாரும், அள்ள அள்ளக் குறையாத அட்சயப்பாத்திரத்தை மணிமேகலையில் சீத்தலைச் சாத்தனாரும் பாடியிருப்பதே பசிப்பிணி நீங்கிய உலகம் வேண்டும் என்பதற்கே.
காலை உணவு

நம்முடைய கலாசாரம் மேலைநாட்டு நாகரிகம் நோக்கி நகர்ந்து வருவதைக் கண்கூடாகப் பார்க்க முடிகிறது. காலையில் அலுவலகம், பள்ளி, கல்லுாரிக்குச் செல்லும் அவசரத்தில் மிகவேகமாக கிடைக்கும் உணவினை மெல்லக் கூட நேரமின்மை காரணமாக அள்ளிப் போட்டோ இல்லை பயணத்திலோ சாப்பிடுகிறோம். காலை உணவுதான் நமக்குத் தேவையான சக்தியை முதலில் அளிக்கிறது. இன்றைய அவசரத்தில் பலரும் காலை உணவினைத் தவிர்த்து விடுகிறோம். காலை உணவினைத் தவிர்த்தால் அது நம்முடைய சிந்தனையை சிறப்பாக வழங்கும் மூளையைப் பாதிக்கும் என்பதே மருத்துவர்களின் ஆலோசனை.காலையில் சாப்பிடும் உணவுதான் அன்றைய நாளின் சக்தியை அளிப்பதாக உள்ளது. அதுவும் இரவு உணவுக்கும் காலை உணவுக்கும்தான் நீண்ட உணவு இடைவெளி உள்ளது. அதை சரி செய்யவே நாம் காலை உணவை அவசியம் சாப்பிட்டாக வேண்டும். இல்லையேல் ஜீரண சுரப்பி நமது குடலை பதம்பார்க்க ஆரம்பித்துவிடும். உடலைக் குறைக்கிறேன் என்கிற போர்வையில் காலை உணவைத் தவிர்ப்பவர்களே குண்டாகி விடுகிறார்கள். காலை உணவினைத் தவிர்க்கும் போது வயிற்றில் வாயுத் தொல்லைகள் ஏற்பட்டு மந்த நிலை உருவாகிவிடும்.
ரசனையோடு சாப்பிடுபவர்கள்

உண்மையிலே ரசனையோடு சாப்பிடுபவர்களை பார்க்கும்போது நமக்கு சற்றே பொறாமை எட்டிப்பார்க்கிறது. இலையில் சரியாக, அளவாக தண்ணீர் தெளித்து அனைத்தும் பரிமாறும் வரை பொறுமையாகக் காத்திருந்து அதன் பின்னர் முறையாக வரிசையாக ஒவ்வொன்றாக ரசனையோடு பாராட்டிக் கொண்டே சாப்பிடும் வழக்கம் நம்மில் எத்தனை பேருக்கு இருக்கும். அவ்வாறு சாப்பிடுபவர்கள் பெரும்பாலும் இலையில் எதையும் மிச்சம் வைக்க மாட்டார்கள். அதே நேரம் வேண்டியதைக் கூச்சமின்றி கேட்டுச் சாப்பிடுவார்கள்.நம்மில் பலரும் அவசரத்தில் வேண்டாம் என்று மறுத்தால் ஏதேனும் சொல்லிவிடுவார்களே என்ற தயக்கத்தாலும் அதிகமாக வாங்கி இலையில் அப்படியே வைத்து விட்டு அதை நாகரிகம் என்று கருதி எழும் ஒரு மோசமான சுபாவம் கொண்டவர்கள்.அதிலும் வேண்டியதைக் கேட்டு விருப்பத்தோடு உண்ண வேண்டும் என்பதற்காகவே பபே விருந்தில் கூட நாம எத்தனை விரயம் செய்கிறோம் என்பது ஆண்டவனுக்கே வெளிச்சம். வீணாக்கப்படும் உணவுகளை ஆதரவற்றோர் இல்லத்திற்கு பகிர்ந்து கொடுத்தால் எத்தனை நலம் பயக்கும் நமக்கு என்பதை உணர்ந்தவர்கள்தான் அறிய முடியும்அவசரமான உலகம் என்று சொல்லிக்கொண்டு திரிகிறோம். ஆனால் நமது உடலை சரிசெய்யும் உணவினை ஒழுங்காக சரியான நேரத்தில் உண்டால்தானே உடல்நலம் பெற இயலும். தொடர்ந்து உழைப்பதற்கான வேகம் கிடைக்கும்.அந்த வேகத்தையும் உழைப்பிற்கான அடிப்படையாக இருக்கும் உணவுத் தேடலையே நாம் நிராகரிக்கும்போது இலக்கை எப்படி அடைவது? நம்மில் எத்தனை பேர் வீட்டிலே அமர்ந்து சாப்பிடும்போது தொலைகாட்சியையோ அலைபேசியையோ பார்க்காமல் சாப்பிடுகிறோம். இல்லை என்ற பதிலைத்தான் வருத்தமோடு சொல்கிறோம். இன்னமும் நாம் உண்ணும் பழக்கத்தை முறைப்படுத்தவில்லையோ அல்லது முன்னோர்கள் கொடுத்ததை பின்பற்றவில்லையோ என்ற வருத்தமும் உண்டு. உணவினை உண்பதிலே ஒரு முறையை வைத்து உண்டு சரியாக வாழ்பவர்களால்தான் வெற்றியாளர்களாக வலம் வர முடியும்.
உணவே மருந்து

உணவே மருந்து; மருந்தே உணவு என்று சொல்கிறோம். சரியான முறையில் பசித்த பின்னர் சரியான அளவோடு சுவையான உணவினை உட்கொள்ளும்போது எந்த நோயும் வரப்போவதில்லை. எனவே நோய்களை தடுக்கும் மருந்தாக நாம் உட்கொள்ளும் உணவே இருந்தது என்றால் அது மிகையாகாத ஒன்றே ஆகும். திரிகடுகம், சிறுபஞ்சமூலம் உள்ளிட்ட நுால்களும் திருக்குறளுமே எப்படி உணவு உட்கொள்ள வேண்டும்? எவ்வகையான உணவினைத் தேர்ந்தெடுக்க வேண்டும் என்ற செய்தினைச் சொல்கின்றன.
பகுத்துண்டு பல்லுயிர் ஓம்புதல் நுாலோர்
தொகுத்தவற்றுள் எல்லாம் தலை'
என்ற குறளை அவசரம் அவசரமாக மதியவேளையில் பள்ளியில் சத்துணவுத் தட்டை வைத்துக்கொண்டு சாப்பிட்டதை அரசுப்பள்ளிகளில் படித்த பலரும் அத்தனை எளிதாக மறந்திட இயலாது. அத்தனை அழகான சூழலை இனி உருவாக்கிடவும் முடியாது. அந்த குறளின் இலக்கணப்படியே அப்போது வாழ்ந்திருப்போம். நாம் கொண்டுவரும் தின்பண்டங்களை சக மாணவர்களோடு உண்டு மகிழ்ந்திருப்போம். எப்போதும் கூடி வாழ முயற்சிக்க வேண்டும். வள்ளுவரும் அதையேதான் கூறுகிறார். பகுத்துண்டு வாழ்வதையே அறமாகச் சொல்கிறது.
பிடித்த உணவுகளை சாப்பிடும்போது ஏற்படும் உணர்வு அலாதியானது. அதை அளவோடு சாப்பிடும்போதே நன்மை பயப்பதாக உள்ளது. அதைவிட மகிழ்ச்சி ஒன்று நம்மிடையே உண்டு. அதுவே பகிர்ந்து உண்பதாகும். மாணவர்களாக நாம் இருந்தபோது ஒன்றாக அமர்ந்து ஒருவருக்கொருவர் பகிர்ந்து உண்டதை எளிதாக மறந்துவிட இயலாது. ஒவ்வொரு முறையும் பகிர்ந்து உண்ணும்போது பசி இயல்பாகவே அடங்கிவிடும்.
--நா.சங்கரராமன்பேராசிரியர்எஸ்.எஸ்.எம்., கலை அறிவியல் கல்லுாரிகுமாரபாளையம்99941 71074

Saturday, June 15, 2019

கருவேப்பிலை பொடி thanks to dinamalar.com


பதிவு செய்த நாள்

14ஜூன்
2019 
00:00
தேவையான பொருட்கள்:
கருவேப்பிலை - 100 கிராம்
வெள்ளை உளுந்து - 100 கிராம்
சமையல் எண்ணெய் - 50 மி.லி.,
காய்ந்த மிளகாய் - 7
பெருங்காயத் துாள் - சிறிதளவு 
உப்பு - தேவையான அளவு

செய்முறை:
காம்பு நீக்கிய கருவேப்பிலையை, நன்கு கழுவி, வெயிலில் உலர்த்தவும். வெள்ளை உளுந்து, மிளகாய் வற்றல் ஆகியவற்றை எண்ணெயில் நன்கு வறுக்கவும். 
இவற்றுடன், உலர்த்திய கறிவேப்பிலை, பெருங்காயத்துாள், உப்பு சேர்த்து துாளாக அரைக்கவும். மணமும் சுவையும் நிறைந்த கறிவேப்பிலை இட்லி பொடி தயார். 
இந்த பொடியில், நல்லெண்ணெய் அல்லது நெய் ஊற்றி, இட்லி, தோசையைத் தொட்டு சாப்பிடலாம். மிகவும் சுவையாக இருக்கும். சிறுவர், சிறுமியர் விரும்புவர்.
- தா.பிரேமா தாமஸ், விருதுநகர்.